أبو المواهب أمين مكي يكتب: الله لا كسبك يا الممسح.

مرايا برس

ذكريات

أبو المواهب أمين مكي

مرة وانا جوه بقالة في حلة راقية بالخرطوم جاء داخل علينا ولد وجيه وجاهة ..ياخي وجيه دي ما بتاكل معاه عيش زاتو الود دا ممكن تقول عليه وسيم عديل كدا ااي وسيم بالواضح كدا.. الجماعة الفي البقالة كلهم قهو فيه الشايل حاجه ختاها وبس فتحو خشمهم زي تمساح مايرنو.. في مزة جات داخلة لابسه ليها لقينج من نوع قميص الدبيب يخربني مافي زول هببو ليها كلهم لمن طلعت بس مقهين في الولد العجيب دا .الود دا بكون بتمسح بالقشطه غايتو دي ما نعومة زول بتمسح بالفازلين. لمن وقف جمبي و سلم على سيد الدكان و قال ليه ازيك يا عمو غايتو ..عمك بتاع الدكان دا قبل ما يرد حسيت ليك وشو دا حيرني حاواجبو دخلو في بعض و خدو اليمين دا اتهزه زي قالب الجلي جاني احساس انو داير يغني عديل كدا من شكل وشو .. اخدت لي دقيقتين بتاعة تمعن إيجابي وانا بعاين ليه طوالي قلت الود دا ممكن يحضر دكتوراة في حرف العين .. ممكن يمشي يسجلها محل بسجلو براءات الإختراع ما اظن في زول بقدر يقول حرف العين كدا ..غايتو دخل و طلع شال ليه نوتيلا واندومي و نحن لسه ما فاهمين شي ..
الموقف دا ذكرني ليك موضوع كدا زمان و انا في بداية الثانوي كان عندي صاحب كدا نضيف نضافة عجيبه يلمع كدا بس.. و مسكين شديد و انا النقيض طبعا ..طوالي مغبش و الوش كلو حبوب تقول طربيزة لحام و زرقة من حوامة الشمس كنت طوالي بشاكل ليه الجماعة البهرشوه .. اختو كانت بتدرس بره .. جات راجعة في اجازة و هو مبسوط شديد قال لي انا جايب ليك هدية المهم بعد ما كشكرته ليه مافي داعي ياااخي و ما تتعب روحك هو اصر ..تاني يوم العصرية كنت في التمرين.. جاء البيت .. البت الشغالة فتحت ليه الباب لمن عرفني مافي اداها كيس ملفوف و قومي يا الشقية امشي ختيه في نص المطبخ في الطريزة و امشي تمي باقي حاجاتك .. الحاجة شكلها جات المطبخ لقت الكيس ما عرفت الحاصل شنو فتحتو وسألت دا حق منو و البت قالت ليها حق الخفسو جابو ليه ولد قبيل و فات ..جيت راجع من التمرين قبل المغربية كدا والحاجة كانت في ماسورة الحوش بتتوضأ بس وصلت نص الحوش ما اشوف ليك الا فردة من جزمتها حقت الزيزي طايره علي جلتني بي بونتي و دنقرت علي الفرده التانية انا طوالي عملت ساتر تحت السرير و سامعها بتقول لي كمان جابت ليها ديانا يا( الخفسو ) الخفسو.. دا طبعا اللقب البتناديني بيه
ياحاجه استهدي كدا بالله مع المغربية دي يقوم يلطشنا شيطان كف كمان ..انا والله ما بعرف ديانا و لا شاغلتها بتكون اتسلبطت فيني ساكت .. طبعا انا متعود على الهجوم و اللفحي بتاع جزم الزيزي و غطايات الحلل والطوات .. في حالة هجمة طوالي ممكن اكون داخل لي اوضه يجيني درج طاير ولا برواز صورة و بعد داك حتي تعرف المشكلة انو بكون في زول جاء اشتكاك .. بت شاغلتها و له جيران طقعتهم ولا داقي ليك واحد في الشارع و جو اهلو البيت .. لكن المرة دي مع الخبط جابت لي الإسم طوالي .. وكالعادة نكرت البت ديانا دي حطب ..و قعدت احلف ليها وانا لسه تحت السرير بانو ديانا زاته من اسمها دا انا ما حبيتها وقلبي مابيها.. علشان كدا مافي سبب بخليني اشاغلها ..قالت لي تشاغلها شنو يا خايب الرجا .. داير تتمسح لي بكريم ديانا .. بعد دا حسيت الموضوع دا انا زي المخطوف ما فاهم حاجه طلعت عيني من تحت السرير قبل ما اطلع راسي زي توم اند جيري خايف تجيني حاجه طايره ..و قلت ليها يا حاجه كدي عايني للوش دا والحبوب الفيه دي خلقة زول بتمسح بديانا ..كدي روقي المنقه و هدي اللعب واطه .. الكلام دا جبتيه من وين ..قالت لي صحبك جاب ليك كريم ديانا أصلي و معاه واقي من أشعة الشمس.
الله لا كسبك يا الممسح انا شاورتك قلت ليك عندي مشكلة مع طربيزة اللحام ولا وشي الأزرق الحايم بيه دا تقوم يا الغبيان تفتح شنطة أختك الجاية من السفر تجيب لي هدية كريم ديانا.