أبو المواهب أمين مكي يكتب: علي النور وحلم الأمير.

مشيت السودان زيارة قلت يا الخفسو امشي ادي صحبك علي النور زيارة و شوف الحاصل عليه شنو طولت منو ملك الرصة و المنصه و الما بعرف علي النور اسالوا منو ناس ابروف تقعد معاه يوديك و يجيبك بالقصص و الدرامات ما تعرف روحك زاتو.. بعد السلامات و الاحضان جاب البارد و ساقني ليك سواقة التيمس ابولستك فيه كركاسه نطط بي لمن بطني وجعتني من ابوشهيق .. جات عربية دعم سريع ماشه قدام ورشتو قلت ليه الطير دا لسه حايم اتلفت يمين شمال الرقبة مشت وجات زي باب البار المزيت جديد طوالي قبض طرف الموضوع و بدا السواقة الجد جد قالي تعرف يالخفسو قبل شهر و نص كدا قاعد في ورشتي دي فاكي لي مكنة بي ام دبليو موديل الفين و ستاشر جابوها لي ناس الوكالة ما عرفو يحلو مشكلته وقفت قدام الورشة عربية نجده سرينته مولعة وعربتين لاندكروزر و معاهم عربية اوباما نزل منه لواء قال لي انته علي النور مع الخلعة اشرته لي كلبي راقد معاي كان تحت العربية بعاين قلت ليهم دا علي النور اللواء قال لي يا زول انته بتستهبل وله شنو يله قفل ورشتك اركب معانا يازول قلبي وقف قلت الليلة الناس ديل مفتكرني من كتائب الظل وله شنو كتمت فيني كتمه لمن لبست الجزمة بالقلبة قلت ياابو النور انته جدك النور عنقرة وجابوكم للدواس تخاف من الطير ديل امشي معاهم موت موت حياة حياة قلت امشي علي اللاندكروزر القريبة اركب في الضهرية قبل ما يجدعوني فيها اللواء قال لي يازول ماشي وين تعال اركب معاي في الفي اكس ار قدام و انا بسوق قلت وحات الله اللواء دا بكون اتسطل من ريحة البنزين الطالعة من مكنة البي ام دبليو الفاكيها غايتو لمن جراني من يدي علي الفي اكس ار عرفت الزول دا جادي و انا راسي بودي و بجيب اتحركنا حبه كدا و انا خايف اسال عملت شنو يا ناس انتو سايقني من ورشتي قام اللواء براه بدا الكلام قال لي يا ابو علوة انته عارف 😳بس من ما قال ابوعلوة دي اتاكدت الزول دا اتسطل بالبنزين الشماه في الورشة قلت لروحي يا عمك ارخي جسمك و اسمع الزول دا بقول في شنو واصل كلامو نحن ماشين علي المطار طوالي راسي مشي بعيد قلت الناس ديل مودني سجن نيالا علشان مافي زول يعرف محلي قلت ليه يااااخي كدي ودوني مكتبكم اول دقوني دق العيش و بعد داك نمشي نيالا قال نيالا شنو يا باشمهندس من ما قال باشمهندس دي قلت وحااات الله الزول دا اتسطل سطلة كورينا ام كرتين و نص قال لي نحن ماشين المطار في طيارة خاصة بتاعة وزير سعودي من الاسرة الملكية اتعطلت الطيارة بوينج 787 dreamliner والمهندسين بتاعين المطار ماعرفوا يصلحوها في واحد قال الطيارة دي كان ما عرف يصلحها علي النور مافي زول تاني في البلد دي بعرف ليها و الزول دا مستعجل ماشي اثيوبيا لمؤتمر ما بقدر ينتظر يجيبوا مهندس من السعودية وله طيارة تانيه اول ما سمعت كلامو طوالي خلفت ليك كراعي ورجعت اتكلت في ضهر الكرسي و عرفت ليك الكتمه فيهم مافيني عاينت لكراعي المخلوفة لقيت ليك الجزمة انا لابسه بالقلبة نزلت كراعي براحة صلحت الجزمة و قلت ليه ماعندك مشكلة ياسعادتك بس اقيف لي اول داير لي كرستالة بيبسي ابل ريقي النشفتوه لي من الخلعة الدخلتوها فيني طلع تلفونو ضرب للجماعة الماشين قدامنا بتاعين النجده وقفوا جمب بقالة نزل الملازم جاب لي بيبسي و اداني ليه قرطعتو ليك في تلاته جقمات لمن اللواء احتار في حنانو وصلنا المطار مشيت علي الطيارة اشوف ليك الامير قاعد فوق بتاوق من شباك الطيارة قلقان و عينو منططه اشرت للكابتن يدور المكنه اليمين القالوا فيها العطل سمعت صوت المكنة اشرت ليه يبطل المكنة قلت ليهم المكنة دي قاطعة كتينه جيبو كتينة جديدة قالوا لي مافي كتينة بتاعة dreamliner في السودان قلت ليهم جيبوا كتينة جيمس واحد مهندس متفلسف قال لي جيمس كيف يركب قلت ليه كلو امريكي بشتغل في الامريكي جروا بسرعة اقرب محل اسبيرات جابوا كتينة عربية جيمس ركبته ليك وزنت الفونيه و البلوفه دورته المكنة اشتغلت ليك زي الجابوها حسه من الشركة الامير دا عاين من الشباك شفته ليك ضرس العقل الفوق من الابتسامة اشر لي تعال طلعت الطيارة غمت لي ظرف وقال لي انا داعيك تجي السعودية عمره الشهر الجاي قلت ليه ابشر انا الشهر الجاي معاك ان شاء الله الجماعة رجعوني البيت باوباما و النجدة لقيت الحلة كلها متلمة تعزي في ام الاولاد قايلني قبضوني فهمت المدام القصة دخلت الاوضة جوة فتحت الظرف لقيت فيه خمسين الف ريال اشتريت منه البوكس الانته شايفو دا و صلحت الورشه طبعا افتكرت السواقة السايقني ليها انتهت قلت يالخفسو كدي اسالوا بس عمرت وله ما عمرته طوالي استعدل ليك في قعدتو قرطع باقي كباية العصير بتاعتو ومسك الدركسون للمشوار التاني قال لي طبعا مافات اسبوعين الامير ضرب بي تلفون قال لي انا حجزت ليك ورسلت ليك التاشيرة مشيت السفارة استلمت تاشيرتي و اتوكلت مشيت لقيتو حاجز لي بالبزنس كلاس والفندق الكبير داك جمب الحرم ماقصر معاي بعد ما عمرت شيلني خمسه شنط ملانة هداية لناس البيت و تاني غمت لي خمسين الف ريال تميت بيهم عرس الولد بس تعرف اغرب حاجه و نحن راجعين لقيت الطيار الكان سايق طيارة الامير هو زاتو السايق الطيارة اول ما دخل و شافني ليك في البزنس كلاس خشه ليك فيني طوالي بالاحضان و شبكني ليك كيف ياباشمهندس و حكي القصة للمضيفات يازول انا من ما ركبت المضيفات مبارياتني عصير بي ورا عصير و الاكل طبخوا لي عديل في الطيارة انا لمن فترت من المضغي غايتو دخلنا اجواء السودان و فضل كدا زي ربع ساعة ننزل مطار الخرطوم جاتتي ليك المضيفة منططه عيونه براحة كدا جمب اضاني قالت لي ياباشمهندس نحن عندنا مشكلة كبيرة و الكابتن دايرك جوه قمت مشيت عليه لقيتو منطط عيونوا زي ضكر الجرول انا زاتي اتخلعت قلت ليه في شنو ياكابتن خوفتني قال لي ياعلي لساتك الطيارة القدام ابو ينزلو قلت ليه مافي مشكلة خليني انزل تحت اشوفهم نزلوني بي فتحة في غرفة الكابتن عاينت لي رباط اللساتك لقيتو معلق طلعت ليه فوق قلت ليه عندك مفتاح انجليزي قال لي ما عندنا قلت الموضوع دا ما بتحله الا بمفتاح إنجليزي علشان احل الرباط قال لي خلاص معناته ضعنا نحن قلت ليه ما تشيل هم انا بنزل ليك الطيارة زح مساعد الكابتن خليه يقعد في كرسيني في الطيارة و انا بنزله معاك بس انته خليك معاي لمن اقول ليك ارفع ارفع و لمن اقول نزل نزل و يدك التانيه في الفرامل قال لي ابشر ضرب لناس مطار الخرطوم قال ليهم نحن في حالة طوارئ فضو المدرج و جهزوا عربات المطافئ و الاسعاف اثناء ما ناس المطار بجهزوا في حالهم انا استلمت منو السواقة و اخدت لفه حول المطار اشوف سرعة الهواء كيف وانا لافي فوق جيت بابروف اشوف ليك الورشه بتاعتي و الكلب بتاعي قاعد قدام الورشه بياكل في كيلو كبدة وصيت يجيبوه ليه قبل ما اركب الطيارة و جارتنا سعاد بتشر في الغسيل رجعت علي الخرطوم ناس المطار ضربوا لينا قالوا المدرج جاهز مشيت علي جهة الرياض عكس الهواء و جيت راجع رفعت راس الطيارة فوق و نزلت باللساتك الورا بس قلت للطيار خليك معاي رافع و الفرامل كبيس بس يازول الطيارة دي ماشه باللساتك الورا لحدي ما وصلت الصالة الرئاسية قلت لي الكابتن فك فكه ليك الفرامل الطيارة دي وقفت زي الجدادة الدايرة تشيل حبة عيشه من الواطه وشه القدام دا نزل براحة مافي زول زاتو حسه بيها نزلتا من الطيارة و الطيار ما مصدق لقيت ليك خلق الدنيا دي كلها واقفين برة يصفقوا حميدتي زاتو كان واقف معاهم كان شكلوا ماشي علي السعودية ولمن اخروا طيارتو علشان الحصل لينا طلع برة يعاين طوالي ناداني قال لي ياعلي انا شفته (غانون) الجازبيه بس (غانونك) النزلته بيه الطيارة دي ما شفتو دحين انا حسه عندي طيارين تبع الدعم السريع بدرب فيهم في روسيا و انت من حسه انا اديتك رتبة لواء خلاء طيار و تجي تستلم شغلك من بكرة طوالي .. اها تاني يوم مشيت ليه في القصر الجمهوري قام 😢😢😢 قمت طوالي مستكوا ليك قلت ليك قبل ما يقوم بي سداري تاني قلت ليه يا حضرة اللواء خلاء ابوالدبرك انا حسه فكني احكي لي باقي القصة بكرة خفت يطلع حمدتي دخلو مجلس السيادة وانا ما عارف😂😂.