أسفار.. أبوالمواهب أمين مكي يكتب: ليه تعملها في حيط الناس؟.

قبل زمن طويل مشيت زيارة السويد بحكي لي واحد اخونا و هو زول علي نياتو و طيبان و ماخد الدنيا بعفوية لمن غلط و حاجاتو الجا بيها من السودان اصلو ما داير يغير فيها ولو بدرجه بسيطة علشان يتماشي مع طبيعة البلد دي ويقدر يتأقلم معاها و يعيش حياتو بشكل ساهل.
بحكي لي و هو داير يقع في الواطة من الضحك انو كان جديد في البلد ما تم ليه يومين و ماشي حايم في السنتر وفجأة حس انه محتاج يمشي الحمام .. و من غير ما يسأل و لا يقول شي طوالي اقرب حيطه مشي عليها و عمل عمليتو شافتو ليك مراة و جرت على ناس الأمن جو مسكوه و ضربوا للشرطة والإسعاف و بحكم انو ما كان بعرف أكتر من كلمتين بالإنجليزي ولا كلمة بالسويدي شبكهم ليك وصف و سلاح الإشارة انو اتزنق ولازم يفكه لمن ما فهموه هاج فيهم وبدأ يصرخ ..و هو طبعا ما عارف انو القانون في البلد ما بسمح انو زول يتبول في الشارع بس على حسب الشي الجاي بيه من البلد عملها ليهم في الحيطة في نص الشارع.. قال لي انا اتوترت و خفت لمن شفت البوليس والإسعاف وبديت انفعل و إكورك ركبوه ليك عربية الإسعاف ودوه المستشفي قال لي ادوني حقنة بعد داك حسيت راسي تقيل ولساني تقيل ما عرفت زاتها حقنة شنو وطوالي عملو ليه تخطيط للمخ يشوفوا الزول دا نصيح ولا مجنون البتبول في الشارع العام و خاصة انهم ما فاهمين بقول في شنو و كواريكو من غير سبب.. لمن بستفسروا منو انو بعاني من مشكلة عقلية وله لا؟.
من أكبر العاهات و التقاليد الموجوده عندنا نحن في السودان منظر التبول في الشارع العام، اذا كنت ما بتعملها في حيطة بيتكم، ليه تعملها في حيط الناس؟.