أبو المواهب أمين مكي يكتب:قهوة ايرش كوفي.

زمان صحبي طبيب جاء جديد لنج ايرلندا وهو ود الجزيرة حدو كان سوق الجمعة في مدني بعدها جامعة الخرطوم ساكن في الداخلية نهاية الاسبوع زاتو ما بطلع منها قال لي بغسل هدومي و بقع ليك في الكتب قراية بس تم قرايتو وربنا يسرها ليه وجاء ايرلندا قال لي يوم جيتي هنا اول مرة اشوف طيارة قدامي بعد طيارات رش القطن زمان ..زول مرضان كورة مرضة عجيبة كان نازل في ميز الاطباء العزابة في مدينتي يوم سبت كدا بعد ثلاثه ايام من جيتو ضرب لي سالني ياخفسو وينك انت قلت ليه شغال والله، مالك محتاج حاجه قال لي داير اتفرج في كورة ارسنال و مان يونايتد الكلام داك زمن ارسنال فيه فان بيرسي و يونايتد فيه فاننيستروي قلت ليه يامنقة هنا الكور بحضروها في البار لمن تكون مولعه سالني وين البار وصفت ليه بار فيه شاشة قدر الاوضة امشي هناك واطلب ليك قهوة وله عصير واقعد احضر كورتك بي مزاج وانا كان لقيت فرصة خلصت قبل الكورة بجيكم هناك ..زولك ساق ليه تلاته اطباء جداد معاه و ماعارفين في البلد حاجه ساقهم ليك البار
ومنتظرين الكورة تبدا جاء الويتر و سالهم دايرين شنو التلاته قالوا عصير و هو قال داير قهوة الويتر قال ليه قهوة عادية وله (ايرش كوفي) الشليق طوالي قال ليه (ايرش كوفي) تكون تقيلة قال لي يامعلم قلت خلاص نحن بعد كم سنه حنكون (ايرش) ايرلنديين و كدا لازم نجرب قهوتهم دي حبة كدا و الويتر جاب الطلبات و الكورة كانت بدت القهوة كانت بارده حبه جغمتها ليك سريع وعجبتني قلت ليه جيب لي واحده تانية مع الزحمة اتأخر حبه و الشوط كان انتهي جاب الكباية التانية شربته ليك سريع الشوط بدا يا عمك بقيت حاسي ليك راسي دا بقي تقيل و لساني ما قادر ارفعو و الكورة دي بقيت ما فاهم ذاكرتي شكلها وقفت في الشوط الأول، مستغرب فان نيستروي بقي يجري على قونهم ليه و جاب في روحه قون و وبلدي في الجزيرة دخلت في راسي شايف اللعيبة ديل راكبين حمير و خروف ناس حسن ابو قرون الاسود داك الكان بسكنا جاري في نص الميدان شايل صفارة و بعد شوية اشوف ليك التوم ود حسن جارنا مقلع قميصو ماشي يجيب الكورة وقعت في الترعة و هو زول جنو عوم بعد ما التوم جاب الكورة تاني وحااات الله ما فتحت عيني الا تاني يوم وانا راقد في السرير في الميز بهدومي كلها سالت الشباب ياناس الحصل شنو انا وين وتيس حسن والتوم فاتو وين واحد قال لي توم منو وتيس شنو يا حبيب انت ضربت القهوة الايرلندية و هي نصها ويسكي و سكرت سكرة بت هاشم واتعولقت فينا جينا شايلنك من البار لحدي البيت وفي سريرك دا من امس من ديك حلفت اي حاجه يدوني ليها فيها اسم ايرش بقول ما داير بخاف يكون فيها ويسكي.