أبو المواهب أمين مكي يكتب: الزول الطير النوم من عيني.

صديقي ساكن في اسكوتلندا حصل ليه حادث المهم قررت اسافر ليه و اشوف امورو ماشه كيف و العلاج وصل وين في ويك اند كدا سافرت و اضطريت ابيت معاه و ارجع تاني يوم ..اليوم داك عندو صديق في عمري كدا انا ما بعرفو جاي من مدينة تانية و برضو بات معانا ..بليل خلاص على مواعيد النوم صحبي قال لي الغرفة القصاد السلم دي فيها سريرين انت و اخونا فلان قصدو الضيف المعانا دا .. المهم خيرت الزول المعاي في السرير قال لي انا خليني في السرير الجوه العلي الشباك قلت ليه ابشر السرير حقك ..رقدت انا في السرير الجمب مفتاح النور ..لا حظت ليك زولي عندو شنطه صغيره كدا شاله ختاها جمبو و ما فتحها قلت انتظرو يشيل حاجتو من الشنطه قبل ما اطفي النور بس حرن اصلو ما يفتحها المهم قلت الزول دا احتمال يكون عندو فيها ورق مهم و دايره جمبو ما اشتغل بيه اطفي النور و احاول اخد لي غمضه علشان مسافر بدري الصباح و اصلا السهر حصل بس مشكلتي ما بعرف انوم في مخده ما مخدتي قعدت اتقلب و اتقلب بعد شوية سمعت صوت السسته بتاعة الشنطه الخاتيها زولي جمبو فتحت ..قلت احتمال داير ليه حبوب وله بخاخة ازمة عملت ميت .. بعد تلت ساعة كدا و انا ما خليت لي خروف ناطي سور حسبتو زي ما في مجلة ميكي الزمان علشان النوم يجي الا اسمع ليك زولي بمص ليه في حاجه و اسمع ليك شيييط..!!! جووط!! جووط !!!
قلت يااخوانا الزول شكلو عندو حلاوة و داير يغنج بيها براه ما اشتغل بيه .. بس بعد شوية اسمعو ليك بشخر حبه و يصن و تاني اسمع الشييط جوووط جووط قلت الزول دا الحقو قبل ما يتخنق و يكون خاتي ليه حلاوة دربس في خشمو و نساها … قمت براحه اتزحزح فتحت النور علشان ما اهجمو .. القى ليك زولي خاتي ليه غشاشة اطفال في خشمو و شايل ليه دبدوب صغير لونو اصفر حاضنو بيده .. قمت برااااحه و انا منطط عيوني شلت بطانيتي و شتات على السلم يا الكنبة جاك زول ..احسن امشي انوم فيها قبل المعلم دا ما يقوم و يصحى يناديني اغير ليه البمبرز الممكن يكون لابسو برضو .
هجمني و طير النوم من عيني.