أبو المواهب أمين مكي يكتب: قصة سفري(2).

رجعت زبطت كباية شاي الشباب كانوا صحوا سالوني حصل شنو امس مع القنصل حكيت ليهم القصة سامي قال لي اديني الجواز انا بجددو الليلة و بزبط ليك موضوع جواب الاجازة طلعت معاه بعد داك نزلت في شارع الجمهورية مشيت علي كافتيريا كوكي بيرغر بتاعة اليوناني كيرياكو لقيت دكتور طمبل قاعد اساسي منتظر اوريه الحاصل قلت ليه الرصة كله قال لي يا خفسو انا موضوع الاستيتمينت والحجز بتاع الفندق دا بحلو فضل لينا التذكرة بس و بنلقي ليها حل ارح معاي من هناك مشينا قهوة رتينا في عمارة ابو العلا الفي شارع الجمهورية كان ذاكرتي ما خانتني لقينا واحد اسمو بابكر .. طمبل بعرفو قعدنا معاه قال مافي مشكلة نهاية اليوم بجيب لينا الحجز المؤكد من فندق في فرنسا و الاستيتمينت كان لازم يكون اقل شي فيه سبعة الف دولار والله جابو لينا حقيقي من واحد من البنوك لمن احترت في راسي الكبير دا الوقت داك كان فضل لينا موضوع التذكرة بس و الموضوع ينجض و ما لاقين ليها حل
طبعا لمن ربنا يكون مسهلة و مسطره عادي ممكن تكون ماشي في شارعك و تلاقيك قسمتك السمحة فعلشان كدا بقول مرات كتيره بعد ما ربنا اكرمني بكراماتو و نعمو علي الكنته محل ما امشي بلقاها في شكل زول يقدم لي خدمة تغير مجري حياتي و الزول دا بتكون الصدفة و القدر جمعتني بيه و مرات كتيره بفكر في الناس البتيأس و تقنط من رحمة الله و نعموا علي العباد البتجيك من حيث لا تحتسب و تتوقع كان صبروا حبه امورهم بتسلك..
رجعنا من بابكر و سبته طمبل و قلت امشي علي حلة خوجلي وانا ماشي علي المواصلات جمب فندق اراك بعد ما قطعت الشارع في جماعة ملمومين قمت رجعت تاني خليت الاتجاه الكنته ماشي عليه قلت اشوف في شنو اها اللمه كانت في انهم ماسكين حرامي ود صغير بدقو فيه سرق اكل من مطعم في بت شابة منقبه ماسكه يد الود و بتحاول تفكها من الاولاد الماسكين الحرامي و بتقول ليهم كان ما جيعان ما كان سرق اكل انا بدفع ليكم حق الشالو فكوه و احد بقول لالا ما بنفكو بجي يسرق تاني لازم يودوه البوليس اللحظة ديك قلت ليه يا اخونا الاستاذه دي قالت بتدفع القروش خلاص ياخي شيل منها و الولد خليه ربنا ينوب عليك بثواب و كم نفر كانوا في صفها المهم بعد ما شافوا كم نفر بقول كدا خلو الولد و ما شالو منها قروش و البت ساقت الولد اتحركت بيه و ماسكه من يدو و انا وقفت حبه اسمع في نقاش الجماعة بعد ما البت اتحركت و البقول بت ناس و البقول ما مفروض تتدخل تميت في وقفتي ديك زي عشره دقائق بعد داك اتحركته علي مواصلات بحري..
قلت ليكم ربنا لمن يقسم و يقول لي شي كون والله العظيم بجيك بكرعينو في محلك لمن تحتار في الموقف كان في حافلة واقفه ركبته فيها لقيت البت دي فيها و جمبها كرسي فاضي قعدت فيه و سلمت عليها عرفتني طوالي اتكلمنا عن الطفل القبيل و احتياجات الناس و ظروفهم و انو الواحد ما بحس بالوجع الا لمن يمر بي عوزة و الناس مفروض تساعد بعض حكت لي انو اهلها في السعودية و هي ساكنه في الداخلية في شمبات جات تحضر ماجستير في الانتاج الحيواني و دايره تخلص علشان عرسها مفروض يكون بعد الماجستير طوالي انا برضي حكيت ليها جيت الخرطوم لي شنو و موضوع السفر الظهر لي فجاة و حصل فيه شنو قلت طبعا امشي حالي بالكلام لمن اصل بحري البت قالت لي موضوع التذكرة دي انا بحله ليك ود خالتي عندو وكالة وعلاقتو باللفتهانزا زابطه شديد و بقدر اقطع منو تذكرة رسمية تشيله تدخلها مع ورقك .. طبعا في ناس كتار بستغربوا و البجيك يقول ليك سواقة.. بت عرفتك حسه تساعدك كيف لكن لمن اقول ربنا لمن يسوق ليك امر و يفك ليك كربة بسوقك بكرعينك لمحل بتتحله و دا الحصل لي مافي سبب برجعني للشكلة الكانت في الشارع و يركبني الحافلة جمب نفس البت الا لي سبب و هو بعرفو براه… و البت كمان مساعدتها ما وقفت علي موضوع التذكرة بس بحكي ليكم عملت لي شنو تاني..
اتفقت معاها الاقيها يوم السبت في العربي اديتها اسمي كامل في الجواز و ودعتها ومن بحري مشيت علي حلة خوجلي لقيت سامي رجع و جدد لي الجواز …
يوم السبت مشيت ليها انتظرتها زي ما قالت الساعة اتناشر قدام فندق اراك جات سلمتني التذكرة شلت منها رقم موبايله كتبتو في ورقة و انا ما كان عندي موبايل ولا قبل كدا مسكت موبايل في يدي زاتو شفتو بشتغل كيف اتفقت معاها لمن ادخل الورق يوم الاتنين بحاول احل موضوع قروش التذكرة معاها قالت لي مافي مشكلة ما تشيل هم انته ركز مع حاجاتك و بعد داك الله كريم بقي همي التذكرة دي ادفع قروشه كيف اتوكلت دخلت علي محل اتصالات في العربي اتصلت بزوج اختي في المانيا قلت ليه داير اتكلم معاك في موضوع المساء اتصل بي في تلفون البيت في خوجلي …المساء اتصل وريتو الحاصل قال لي التذكرة كان اشرته انا بدفعها ليك و الموضوع منتهي والله حسيت من الفرحة زي الركبت الطيارة خلاص …
صلاة الصبح لاقيت هارون بعد ما صلينا سالني اها امورك مشت كيف حكيت ليه انو بس فضل لي بكرة ادخل الحاجات قال لي بكرة تاني الاولاد حيقروا ليك يسن و امورك مقضية .. مشيت تاني يوم السفارة سلمت الورق كلو للسكيورتي و قلت ليه مدام تور منتظراه اتصل بيها قالت ليه ايوه خليه يجي راجع الاثنين
الجاي ..