أبو المواهب أمين مكي يكتب: قصة صاحبي مع السفر.

صحبي كان مرضان بتاع سفر مرضة ما عادية الزول دا شدة ما تاعبو ليك موضوع السفر كان داير يخش الحمام بستف شنطتو ..ما خلى ليه سفارة كدا في السودان ما دخل جوازو فيها ..مرة كدا واحد حنكو ليك و قال ليه انا و القنصل الأمريكي كدا بس أصبعين جوه خاتم واحد. زولي طبعا صدق و مشي معاه قال لي والله نحن في الصف بره لمو فينا الحرس دقونا دق العيش قمنا من الواطه بس فول حاجات و الزول داك طلع بعرف واحد من الشغالين في النظافة جوه السفارة لا قنصل و لا يحزنون .. ياخي دا دخل جوازو سفارة تشاد رفضو ليه .. ناس موزمبيق قالوا ليه ما تجي حايم قدام شارعنا ..
غايتو لمن تعب نفسيا شديد من الموضوع دا ربنا عترو ليك في واحد مرضتو الشيوخ …قال ليه السفر دا الكايسو انته انا شيخي تب بسفرك انته بس اختار الدولة الانت عايزه ..التأشيرة دي يدقوها ليك في جوازك أسهل من ختم شهادة الروضة..وزاد ليه الموضوع توم وشمار و حكى ليه انو من ما عرف شيخو ما قرا لامتحانات بس نهاية السنة بودي القلم للشيخ و الشيخ بعزم ليه فيه و بدخل الإمتحان بمسك القلم بيدو والقلم بكتب براه.. غايتو زولي من سمع الكلام دا ريالتو حصلت قريب الواطه .. و طوالي قبل ما يرد عليه جرى البيت ستف شنطتو .. وجاه راجع شايله و شايل جوازو معاه طوالي قال ليه يلا ارح وديني للبفزعني و بنجدني .. المهم يالله و يامين قدرنا نقنعو يمشي بكرة لانو الدنيا ليل و البلد دايره ليها سفرة ..
تاني يوم اتلمينا معاه حبة الأصحاب المرضانين بالسفر و مشينا للشيخ غايتو دخلنا كدا الشيخ زاتو خلعنا سلمنا عليه و قال لينا اقعدو .. و الزول الجابنا مشي وسوس ليه جمبو و الأوضة بخور ونور خافض و رهبة و خوفة الشيخ قال قربوا قربنا بسأل فينا واحد واحد انت داير تمشي وين غايتو البقول امريكا و البقول كندا والبقول انجلترا و معانا واحد لطخ كدا قال داير يمشي مصر دا قربنا نديه كف بس خفنا من الشيخ بس بعد دا الشيخ تف فيه قرب يقول ليه قوم من هنا ياكافر..و صاحبنا سيد المشوار برجف زي عصيدة السماية ..قام الشيخ يشيل الجوازات واحد واحد ويقرأ فيها و يمدها لسيدا و يقول ليه انت بتسافر غايتو لمن جاء دور صحبي و الشيخ مسك الجواز بتاعو و قبل ما يقرأ فيه رماه جمب كراعو وقال ليه انت ما بتسافر حته بورتسودان ما بتصلها ..قوم يا الشقي و هو طبعا مانع اخمش جوازك و معاه كراع الشيخ لمن الشيخ قلب هوبا بحركة ورا و قال للشيخ قوم بلا شيخ بلا بطيخ انت قايل نفسك السفير الأمريكي قوم لف كدا و معاها ام دلدوم مااااكن لمن الشيخ جاهو ابوالشهاق.
غايتو الحوارين بتاعين الشيخ رفعو جلاليبهم وعضوها بسنونهم لموا فينا سكونا سك بعد داك لي طرف الحلة التانية ما حصلونا …