أبو المواهب أمين مكي يكتب: يوم عزاء pet

نيوزلندا من الدول العجبتني شديد حتى ناسها طبعهم حلو حاجتين بس غيرو راسي من الاستقرار فيها لأني بعد زيارتي ليها قبل كم سنة حسيت انو البلد بتشبهني ومفروض اعيش فيها كان ما موضوع السفرة الطويلة جدا وانا بكره قعدت الطيارة و موضوع الزلازل الفيها مرات دي كان ما كدا كان حسه قاعد متكل في ويلنغتون اساسي .. عماد دفعتي كان في الثانوي و صاحب كورة و حوامة ايام مدني الحلوة استقر هناك من سنين و زول نكته و صاحب واجب قال لي في حلتهم في الجزيرة كان زول مات ليه حمار كانوا بمشوا يقدموا الواجب علشان كدا كان قلت ليه نمشي نشيل فاتحة كان اول زول بتلقاه ماشي قدامنا على الصيوان يرفع يدو ومعاه صوتو المانع التقول دكر بط الفاااتحة ياااخي مرة عندنا صاحبنا نقادي ابوه مات مشينا نعزيه بعد المدرسة كشح ليك النقاده فاتحة لمن احتاروا غايتو ماعرفت قرأ شنو كل ما اقول اسألو أنسى.
جاتني رحلة عمل لنيوزلندا الساحرة عماد اصر انو اقعد معاه بدل الفندق .. كانت اجمل يومين اجترينا الحاجات الحلوة كلها قال لي تعرف يا خفسو اول ما جيت البلد دي و استلمت وظيفتي تبع الشركة الرسلتني من الخليج كنت مفتكر روحي بعرف انجليزي كويس قبل ما اقرر بعد داك اخش كلية و ازبطوا جيت اول يوم والمكتب كلو خواجات انا الأجنبي الوحيد لقيت لي واحدة قاعدة في مكتبها وعدد من الزملاء بجو و بمشو بسلموا عليها و بدوها ورد لابسه اسود و شكلها حزين قال لي طوالي قلت الزولة دي مات ليها ابو ولا اخو فكرت امشي اكشح ليها الفاتحة لكن رخيت حبه قلت اشوف المات منو اول علشان اتكلم عنو (اذكروا محاسن موتاكم ) رغم اني ما بعرفو ولا بعرفها رخيت اضاني سمعت ليك واحدة قالت ليها

Losing such an important part of the family is never easy. I’m thinking about you. Don’t hesitate to call me if you’d like to talk
قلت الموضوع دا موضوع زول مهم شديد ليها طوالي سالت ليك اول زول جمبي قلت ليه المات منو زولي بحزن كدا قال لي
She lost her pet
حلف لي بالتكتل امو انو سمع كلمة شي لوست هار بيت دي قال معناته المراة دي بتها ماتت قال لي ما عرفت انا كيف زاتي ربط الكلام دا نص عربي و نص انجليزي انا عمري كلو مفتكر الحيوانات المنزليه ديل بقولوا ليهم بالانجليزي (انيمال) بس pet دي يخربني ما درسونا ليها و في الخليج مافي باكستاني قال لي عندي pet قال قمت كشحت ليك ليها الفاتحة لمن احتارت في راسها الكبير دا و قعدت تحكي لي عن المرحومة بانها آخر شهر كان عندها سرطان و عملوا ليها عملية و قعدوها في العناية المركزة اربعة ايام بعد داك لمن فقدوا الأمل فيها كلموها انو لازم بعد دا تجي تديها نظرة الوداع علشان حتموت و قالت مشت و ما قدرت تدخل ليها و تودعها يااااخي انا قربت اجعر معاها لمن شفت دموعها نزلو بعد داك اسبوعين انا كنت حزين معاها لمن عرفت ليك بعد داك انو (بيت) دا طلعت كديستها طوالي اتذكرت كديسة حاجة بخيته في الحلة كنا بنربطها من كراعها و نجرها في الواطة لمن الكديسة يوم ماتت مخنوقة بالحبل يعني الخواجية دي كان قلت ليها كدا ممكن عادي كان تضرب للبوليس يرجعوني السودان.