أسفار… ابوالمواهب أمين مكي يكتب :الحلزون بالفلفل

اتعرفت على مسلم كوري جنوبي طالب دكتوراه في المسجد وبقت بينا صحبة  وود، عزمني كم مرة غداء و كنت بتحجج بظروف مختلفة علشان ازوغ من الغدوة لحاجة في نفس يعقوب المهم اليوم داك عصر علي شديد و اصر الا اجيه يوم السبت اتغدا معاه …. طبعا جهزت روحي و ما نسيت باقة الورد وعلبة الشوكلاته لزوجته .. وصلتو يوم السبت واستقبلني احلى استقبال ونسه في الصالة لمدة نصف ساعة كدا جات زوجته قالت:الأكل جاهز. اتحركنا علي محل السفرة في الصالة التانية و اول ما عيني وقعت في الاكل بعد مسحة سريعة للطربيزة كلها جاتني رجفة و كتمة نفس طوالي. .. قعدت وانا تاكل يدي في الكرسي علشان ما اقع .. الاكل طبعا كان عبارة فلم رعب .. حاجات بتشبه العناكب في صحن و محار فيه حاجات جوه كدا رجول دجاج بي اصابعهم التحت ..شوربة راس سمك مفلطح سنونه زي سنون حبوبتي الله يرحمها الكانت بتعضينا بيهم لمن نقل ادبنا زمان و ايدين اخطبوط في صحن ما مقطعات و في صحن كدا شكلو زي قطع الدجاج الصغيرة المقطعة بس قلت دا حقي ما برفع عيني منو و ما بخليهم يقربو منهم وقعت ليك فيه مع السلطه بس كان توابلو حارة حبة قلت ما مشكلة المهم شغال بضرب فيه و بتحاشى اعاين للحاجات التانيه قامت زوجة صاحبي قالت لي الحلزون بالفلفل الحار عجبك شكلك ..

بس سمعت ليك كلمة الحلزون دي .. و قلت ليهم و انا صوتي بقي زي فحيح الثعبان حمامكم بي وين .. وجري الجوه بطني من قبل شهر طلعته ليك و قربت تجيني جلطة المهم ربك رب الخير بعد ربع ساعة طلعت من الحمام .. مبتسم ابتسامة حلزونية قالوا لي مالك قلت ليهم الفلفل الحار بتاعكم كتلني كتلة لازم امشي الدكتور عندي حساسية ضد الفلفل احصل آخد حقنة قبل ما جسمي يورم .. و وين عربيتي طوالي البيت مشيت طلعت باقي الحلزونات … وتاني التوبة من الأكل مع الكوريين مش قلت ليكم قبيل حاجة في نفس يعقوب دا طلع يعقوب زاتو.