حسن إسماعيل يكتب:أنت ثوري؟ إذن انت غبي!!. 

الخرطوم :مرايا برس 

ـ هذا المعنى وهذا التعبير محدود (صلاحية الاستخدام) ..يصلح للإستخدام ليوم ( 30 سبتمبر 2021) …!! وللذين خرجوا فيه …
ـ ولتبيان ماأريد قوله عزيزي ثائر ( الخميس) فسأتحدث معك بالفصيح و ( الدارجي ) !!
ـ حسنا …هل خرجت ثائرا يوم أمس الخميس من أجل ما يسمى دعم التحول الديمقراطي او الإنتقال المدني ؟ إذا كانت الإجابة نعم فعفوا يعنى.. أنت غبي ومافاهم حاجة وعليك ان تتخلص من أذني الحمار التي فوق رأسك …وأن تمسك ( بالبردعة ) التي فوق ظهرك (وتجدعها) بعيد وان تنزل ( بضم التاء) هؤلاء الذين يمتطونك منذ سنين. 
ـ أعطني أذنك ولاتقاطعني…أذنك الصغيرة وليس أذن الحمار !! ( معليش يعني )
ّـ جاوبني…هل خرجت قبل سنتين من الآن لتحتفل في شوارع الخرطوم بتوقيع الوثيقة الدستورية ؟ هل الإجابة نعم ؟ طيب مالك ؟ الحكومة الحالية هي بنت تلك الزيجة …الزيجة الحضرت حفلتها وعرضت في قطع رحطها …تاني مالك طالع ؟
ـ طيب …كنت بتجي ميدان الإعتصام ؟ أيوة ؟ أها سمعت خالد سلك وهو بنوركم بالمفاوضات وقال ليكم اتفقنا على مجلس سيادة شرفي ماعندو صلاحيات نصو مدنيين ونصو عسكر؟. طيب إنت صفقت ونططت وفرحت ..الجديد شنو ؟ ياهو ده اتفاق ناسك …الليلة متظاهر ضد شنو انت ؟
ـ ماسامعك !! التحول المدني ؟ يعني شنو ؟ أهااا…تطردوا المكون العسكري خارج السلطة؟ ياخي دي ماعايزة مظاهرات تركب تجيها من عطبرة ولا من بربر …دي عايزة ناسك المدنيين الفي الحكومة يعملوا مؤتمر صحفي ويعلنوا إبطال العمل بالوثيقة الدستورية …أيوة الوثيقة الدستورية الإحتفلت بيها دييك …يلغوها ويبقوا مارقين ويشوفوا ليهم لجنة أمنية تفتح ليهم شوارع القيادة ويمشوا يعتصموا ويسقطوا برهان ( ده لو بقدروا يعني )!!…لكن يعبوك إنت زي كيس الآيسكريم..يملوك هوا ويطقوك طاااخ ويقولوا ليك أطلع شتم لينا العساكر وهم يمشوا يواصلوا الإجتماعات مع العساكر ويجيزوا الموازنة…أيوة الموازنة الحررت السوق وضربت الأسعار في (1000) ..ّّ.. تبقى انت مجرد ( تور عميان ) مش ثائر. 
ـ طيب نرجع للتحول المدني والإنتقال الديمقراطي.. العساكر قالوا نمشى نعمل الإنتخابات ، حمدوك قال نمد الفترة الإنتقالية تاني أربعة سنة !! وقحط قالت الإنتخابات مؤامرة على الثورة !! أسي المحتاج يتظاهروا ضدو منو ؟ ( إنت مانصيح ) ؟
ـ بعدين انت عارف أهم أركان الحكم المدني شنو ؟ ولا إنت زى ناس الكيته تنفخ وتدق وماعارف العريس منو ؟ ياخوي ..أركان الحكم المدني مجلس منتخب ومستقل للتشريع والرقابة ، وقضاء ومحكمة دستورية …كدي راجع الأركان دي في ؟ والمغيبه منو ؟ مغيبنها ناسك الجابوك مظاهرات (الضهر) وفرقوك بالمبان العصر ….
ـ الحاصل ده …شراااكة بين لجنة البشير الأمنية وأربعة أحزاب من قحط وإنت مشغلنك (فزاعة)…أيوة الفزاعة البركبوها في الحواشات تخوف الطير …. وإنت سبب واحد يخليك تبقى فزاعة وله طيرة مافي…
ـ ( أنت تغني منذ سنين في الحانات وشيخك يشرب ….هذا عشق أجدب ) !!
ـ أها دي القصة …طبعا كنت عايز اقوليك إنت زول مسكين …لكن المسكين ده البسرقوا حقوا من جيبوا وهو ماعارف ….بس الغبي هو البشيلوا حقوا ويركبوا في ضهروا يوصلوا السارقنوا لحدي بيوتهم !! وهو بهتف كمان. 
ـ عزيزي (الثائر) …لو عندك طاقة زايده أمشي كافح (القبور) في مشروع الجزيرة وله أمشى طلق كرعيك طارد الأرانب في البطانة …ماكعب
ـ كعب ينقط عرقك ورا (تلاتة أرباع) من ناس قحط. 
ـ عيب تطلع تناصر ليك ناس واحد من أعضاء مجلس السيادة تبعهم قال في تلفزيون السودان : لينا كم شهر إجتماعاتنا لتزجية الفراغ فقط …
ـ شفت كيف؟. الراجيهم إنت بزجوا وقت الفراغ في مكاتب الدولة وفي الإجتماعات و ( أنت أرجى سفيه ..ماترجى عاطل ) !!
ـ وآخر حاجة …عايز أديك التمرين الصغير ده …أمشي اشتغلوا بينك وبين روحك براااحة كده. 
ـ طيب ؟
ـ علماء السياسة بعرفوا الثورة بأنها ( فعل شعبي يحصد نتائجه جموع الشعب هدفه تغيير الأوضاع القائمة إلى الأفضل)
ـ اطلع اقرأ التعريف الفوق ده تاني ….
ـ قريتو ؟ يلا جاوب. 
ـ من سنتين …شنو الإتغير للأفضل؟ …أبدأ من روحك ..وأمك وأبوك وأهلك .. وأمشي على الأسعار والعلاج والتعليم والأمن والمستقبل.. 
ـ جاوب براك وقرر ….واطلع من حتة توصيف عنوان المقال الفووق ده …ماتبقى غبي !!.