حوار بعربي جوبا…لوكا ميان دينكاوي يحب السودان ويطرب للأغاني السودانية

الخرطوم :مرايا برس 

عايز اكون تاجر عطور أمشي وادور بين الحسان.. ود البادية
وجدت أغاني كبار الفنانين تنساب من هاتفه وهو يزاول عمله في البناء بدارنا الكبيرة فأثار هذا الأمر دهشتي..
لوكا ميان دينكاوي من دينكا تونج يعمل في البناء، يبني ويمسح، يحمل هاتفه في جيبه ويستمع لأغانينا السمحة وردي وصلاح بن البادية وإبراهيم عوض والجابري. سألته هل تفهم هذا الغناء قال لي امتلك أُذن تفهم وتتذوق لكني لا أفهم كل الكلام بالعربي. كان يستمع بقلبه وكأنه يجتر ذكريات بعيدة ، دعوته لفنجان قهوة تحت ظلال نخلتنا المورقة، لأعرف سر حبه للسودان وفناني السودان. 
وكانت ونسة بسيطة بلغة أهلنا بالجنوب(عربي جوبا). تتخللها بعض الأغاني من الزمن الجميل.
هات يا زمن جيب كل أحزانك تعال.. للجابري
أشوف في شخصك أحلامي وسحر الدنيا في عيونك يبعد عني احزاني.. لوردي.
بزيارتك بيتنا نور وكله زينه جاتنا بسمة فايحة نسمة في عينينا.

ونسة : أمينة الفضل

– اسمي لوكا ميان من دينكا تونج ولاية واراب ولدوني بداية الستينات وقريت لغاية سنة تالت ابتدائي طبعاً الدينكا جعليين الجنوب (ضحك ضحكة كبيرة) ، كنت بشتغل في الرعي ولمن كبرت اشتغلت في الزراعة والبناء. جيت الخرطوم وعمري ٢٢ سنة اتعلمت البناء والبياض والسيراميك اتعلمت هنا في شرق النيل المايقوما.
اتعلمت على يد واحد إسمه محمدين من أولاد البقارة وعبدالله عبدالتام علموني البناء وواصلت لما بقيت معلم بناء.
عشت مع الشماليين وكنا مع بعض في أي حاجة (موية ما اندفقت بينا) كنا كويسين (ولا الإبرة ما وقعت بينا).
– الجنوب زمان كان سمح شديد كان الناس مع بعض مافي مشاكل، كانوا العرب بجوا من الشمال وبفتحوا دكاكين ويشتغلوا في التجارة والجنوبيين كانوا معاهم سوا سوا، والشماليين يتزوجوا من الدينكا، واحد من الشمال عندو دكاكين وبقر كتير، اتزوج تلاتة نسوان من الجنوب وعندو اولاد كبار ومنهم موجودين هنا في الجريف غرب.
– زمان في التونج كان معانا واحد إسمه مبارك كنا بنجي نتونس معاه، وناكل ونشرب زمان ناس طيبين هسة تلقى صاحبك يتكلم بوراك دي حاجة ما كويسة، النفوس اتغيرت، ناس بقى كعب. في ناس هنا في الشمال تعامل معاي كويس وعلموني البناء وبقيت معلم كبير في بناء.
– انا متزوج تلاتة نسوان، واحدة ماتت واتنين موجودات، عندي سبعة أولاد وستة بنات، لكن نحن بنات ما ندورو، لما الراجل يتزوج يقول للمرة لو جبتي ولد حقك، لو جبتي بت حقك، لكن انا في قلبي تجيب ولد بس.
– عاداتنا في الزواج زي العرب يمشي أبوك واخوانك لأبو البت يقولو عايزين البت دا لولدنا، والواحد بشوف ناس نضيفين وكويسين وبتهم سمحة يتزوجوها ب ٢٥٠ بقرة و٣٠٠ بقرة، انا اتزوجت اتنين ب٦٠ بقرة والمرة الأخيرة ب٨٠ بقرة، واولادي اتزوجوا ببقر كتير ، لكن في حاجات اتغيرت اولاد زمن دا بقى يعمل حاجات عجيبة.
– أولادنا هنا يعرسوا بقروش لكن لو مشى الجنوب القروش يفرتقوها وبشتروا بقر القروش تموت ساي.
عندي ود اخوي اتزوج هنا دفع ٨ مليار ولمن مشينا الجنوب اهل البت قالوا لينا (مش بتنا جات يلا دايرين بقر ما دايرين قروش) اشترينا ١٨٠ بقرة.
– في الزواج نحن ما نلبس زي العرب المرة تلبس السكسك، وتلبس سلك زي الدهب في اضانها والراجل يعمل ألوان في(وشه) وجهه، ويلبس الجلد والريش، ويرقصوا والعروس يجوا البنات يسوقوها ويمشوا معاها أخواتها وإخوانها وأولاد عمها، والناس الكبار يجوا الصباح يضبحوا البقر وناس البت ياكلوا سبعة يوم، وطبعاً البت عندنا ما بتتزوج ولد عمها ولا خالها لأنو ديل اخوانها (في زول يعرس اخوه)، بعرس من ناس تاني.
– في ولادة المرأة بنعمل سماية نفس الوضع الانتو بتعملوه، نضبح خروف وناس ياكل واطفال صغار ياكل ، كان جات بت تكون راقدة في السرير بس زول يشيلوا مافي، لو جابت ولد كل البنات يشيلو الولد بالدور كل واحدة تشيل وتدي الجنبها لما يوصل تاني لأمو،، البنية ما يشيلوها تكون راقد في سرير بس.
– زمان كانوا يكسرو للأطفال الصغار الأسنان القدام لكن هسة خلو حاجة دي زمان يكسروا أسنان لأنو أهلنا الكبار كانوا (عويرين) ساي، (ضحك لوكا ضحكة طويلة) وأضاف.. هسة خلاص حاجة دا انتهى كل الاولاد الصغار اسنانهم موجودة زمان كانوا يعوقونا بس ويكسروا الأسنان.
– انا عشت في الشمال ما حصل واحد شاكلني ولا اتكلم معاي لكن مرات النوير يشاكلونا (لكن جنا عرب دا ما بشاكل نحن قاعدين معاهم سوا ناس طيبين شديد.
– لمن حصل الانفصال انا جيت راجع هنا وقبل الانفصال انا مشيت ٢٠٠٦م الجنوب اهلي قالوا لي يا لوكا تعال اتزوج بقر حقك بقى كتير وفي حرامية بشيلو بقر، انا مشيت اتزوجت المرة التالتة وزوجت لأولادي وزوجت لولد عمي، تاني رحلنا واو وفي واو اشتغلت في البنا ولو أي زول داير نشتغل ليه بيته نمشي نشتغل ومرات نمشي جوبا نشتغل في البنا ونجي تاني واو نمشي ونجي بطيارة وياهو دا شغلي.
– قعدت في جنوب وجيت تاني راجع قبل سنتين عشان انا عيان، مشيت الجنوب وجيت تلات مرات والانفصال حضرتو في الجنوب.
– انا بحب الاغاني وبسمع لفنانين كتير من الشمال، زي وردي والكابلي، وصلاح ابن البادية كان ساكن الجريف ، والجابري، وزيدان إبراهيم الكان عايش مع امو وما متزوج ومات، وسيد خليفة، ومحمود عبدالعزيز، والنور الجيلاني الفنان الشعرو طويل دا، مرة جا عندنا في الجنوب وجا في بيتنا بغني جوبا جوبا، وفنانين كتار جوا الجنوب زمن نميري.
وبسمع اغاني حقت جنوب لكن اكتر حاجة فنانين عرب، انا ما بفهم كل الكلام بالعربي لكن بختوا في راسي هنا وبفهم شوية شوية واضاني تسمع كويس الموسيقى وتعرفها. الله يرحمهم كلهم ماتوا.
غنى حقهم سمح شديد.
– حقو الناس ما تعمل مشاكل ويقعد مع بعض(يلصقوا مع بعض) وكلنا نعمل عمل كويس عشان السودان دا يمش قدام. انا بحب السودان كتير، ومافي زول شاكلني ناس كويسين شديد، مشاكل مافي داعي ليه.