خربشات أنثى…آلاء الشرقاوي تكتب:ليه نحن بنرتبط

بما انو الترند الأيام دي عن الإرتباط والعلاقات والزواج.

ح نتكلم عن الإرتباط.. يا جماعة لشنو نحن ك بني آدمين بنرتبط ببعض؟ سؤال بديهي وقد يكون سخيف صح؟! بس للأسف الإجابة بتوجع وح تشوفو بس جهزو المناديل.

الاجابة:

بنرتبط عشان الإنسان كائن اجتماعي ودي سنة الحياة ولازم النسل البشري يتكاثر.. متفقين صح؟

طيب..

إذن البحصل دا شنو في   العالم؟

في احتمالات كتيرة شديد..

منها وأهمها عدم وضوح الهدف من الارتباط؟؟ لشنو و متين ومنو وعشان شنو؟

وكمان البوجع اثناء فترة الإرتباط عدم الوضوح في كل شيئ حرفيا يعني مقدرة على تزيف الحقيقة واغراق في بحر الأوهام، أنا الفظيع وأنا الرهيبة وهو الجنتل وهي البرنسيس..

وفي النهاية اكتشفوا الاتنين حقيقة بعض وكل الحب وإحساس العصافير داك يتحول لمهاترات وإنت كنت كيف وهسي كيف وإنتي وأنا وهلم جرا.. وفي النهاية ي إما افترفو بطريقة قاسية جدا تفقدم الثقة في العلاقات. او بستمرو خوف من احتمال ما القى زول ارتبط بيهو والناس والدنيا والعمر والأولاد والمصاريف وووو

في اعتقادي…

مبدأ اي علاقة في الدنيا ؟…!

أول حاجة: الوضوح والحقيقة، مهما كانت مُرة عشان لما تعرف من البداية ح تقرر صح وح تطلع بأقل الخسائر..

الحاجة التانية: الثقة، إحساس إنك واثق في قرار الطرف التاني في خياراتو في طريقة حل المشاكل او حتى تقبل الصدمات مهما كانت..

الحاجة التالتة: الأمان، قبل ما يكون بيت وعربية وقروش هو شعور بنحتاج ليهو بقدر إحتياجنا للموية والهوا . إحساس إنك  مُسلم روحك لزول ومأمنو على عمرك … يعني ما بتكون خايف يجي يوم وتترمي في الرف أو الكتف والحيل الكنتا ساند عليهو يخذلك او حتى يحسسك إنك عادي وجودك وعدمك واحد. وياريت نحافظ على الأقل بجزئية الأمان دي بالذات عشان لحظة فقدها في الطرف التاني  بتكون زي المسدس كاتم صوت إنت الوحيد البتحس بالطلقة والناس ما ح تعرف وجعك إلا لما يشوفوك بتنزف دم.

الحاجة الرابعة: هي المودة والرحمة والشعور دا بيجي بعد عشرة عمر وتحديات ومشاكل لابد منها بس في ثوابت بترجعنا أحلى من الأول وبتحافظ لينا على صمودنا تجاه كل أزمة ممكن تمر علينا بس بالحب والتفاهم والحوار اهم حاجة ح نقدر نكمل المشوار ..

تخريمة…

أنا من الواقع البشوفو برغم إجتهاد الناس في المحافظة على بعض وترميم ما مزقته الأيام اتضح لي انو مربط الفرس هي الحقيقة، الوضوح، الصراحة والشفافية…

خليكم واضحين حتى في عيوبكم  لأنها جزء من شخصيتكم ودا بختصر عليكم نص الطريق والله.

اي نعم البحب بسامح بس ما تسوقو في الغلط والكذب عشان البحب دا زااتو اذا كترت عليهو بكره اليوم العرفك فيهو..

الحاجة الخامسة: الطمأنينة، يا جماعة ياااخ دي أعلى( level )ممكن نصل ليهو في علاقاتتا الانسانية لأنها ما بتجي بالساهل بتجي بعد الوضوح والثقة والأمان والعشرة الحلوة والمودة والرحمة لأنها بتكون كوكتيل “إكسير الحياة” لأننا لما نصل النقطة دي ح نعيش حياة كلها حب وتفاهم و أمل في بكرة وثقة في بعضنا قادرين نتخطى بيها عقبات الزمن  بفضل و كرم ربنا  علينا وعشم في رحمتو لبلوغ أعلى الجنان بإذنه تعالى.

وأخيرا…

حتى الممثل عندو نهاية  للفيلم او المسلسل يعني في حاجة اسمها.. The End … يعني فركش شطبنا بيتك بيتك وبعدها برجع إنسان عادي والله.

فشنو خليك معاي وااضح اوعاك تكون بين بين…

في النهاية..

كلمتي البحبها جدا : العبرة ليست بالخواتيم العبرة بالمواقف..