د. خالد البلولة يكتب :خطرفات ود آمنة

الخرطوم :مرايا برس

ونحن صغار قبل الالتحاق بالمدرسة وبعدها كان بيتنا فى القرية مكون من الجالوص فيه برندة ملصقة مع غرفة والمطبخ منفردا وادبخانة فى طرف الحوش،ويسمونها (بيت الادب) مافي زول بتكلم فيها (وبسموها المستراح) وهى كلمة تركية تعنى بيت الادب ،ومثلها سلخانة وشفخانة.

والحمام (لنظافة الجسد من العرق او اى وسخ )بكون فى نفس الاوضة تقعد فى الطشت وتغرف الموية بيديك الاثنين وفى ناس بسموه (حى ووب) لانه يشبه طريقة النسوان عند البكاء على موت شخص عزيز ..ومرات كتير الموية بتدفق بالجنبات .
وعندنا بيت مؤقت فى الشرق محل الجروف على الضفة الشرقية من النيل الازرق وهى اراضى الزراعة والبيت يشيد من القصب واعواد اللوبا العدسى وهى غرفة واحدة ما فيها حوش ،ومخصصة لكل شىء غرفة نوم ومطبخ وقيلولة ،نحن النهار كلو فارين نقبض فى القمرى والطير /والوجبات عادة اما ملاح روب او ويكاب او ويكة فى الفطور او قمرى او سمك /او لحمة عتود او حمل ضان فى وجبة الغداء والعشاء فطير بلبن او عصيدة قمح .وتجد الغنم (معوز وضان ) راتعات جوار البيت.
والحاجة المحيرانى حتى اليوم ، فكرة التبول الجماعى لمن نكون دايرين نتبول اى زول بشيل ابريقه ويدقش الخلاء،المهم تبعد مساءالسكن، واى حتة فى الخلاء ادبخانة وازالة النجاسة بتكون بطوب البرجوب ،(اويسمونه الجمار )وتقعد بعيد شوية من رفيقك والونسة تدور نتونس فى اى حاجة ومرات نطول القعدة بس عشان الونسة تطول بدون اى حرج .
====
كانت ايام الاثنين والخميس من كل اسبوع ننتظرها بفارغ الصبر وفيها نزور ام ضبان للخليفة يوسف وبدر وهو من اهلنا بالنوبة ،وام ضبان بمثابة المدينة لنا ،منها زيارة الشيخ وطلب البركة والدعوات الصالحات ومنها نشترى الرغيف المدور والحلاوة ، كنّا نهتم بالثانية اكثر من الاولى ونمشى مشوار كيلو ونص حتى ننتظر اللورى الذاهب الى ام ضبان
واللورى لا يترك قرية من القرى الواقعة بين البنبوناب وام ضبان الا اداها طلة واحيانا يقف ينتظر زول يؤشر بعمته من مسافة 500 متر والناس لا تكل ولا تمل لاحقين شنو ؟
وياتى اللورى محملا بجوالات العيش واللوبيا والغنم والنعاج والخرفان والعتان والتيوس كلو مع بعض ،والدجاج والحمام مربوط على سيخ اللورى .
اللورى كوكتيل من الصور الحياتية والتالف العجيب بين الانسان والحيوان ،فتجد جارك اب التيس اب صناح ،او يجلس جنبك شخص لم يزر المسواك فمه منذ ايام و(وريحة خشمو ما تديك الدرب )وتجد شخصا اخر رائحة إبطيه حدث ولا حرج ،وتجد اخرا يرتدى جلبابا اختلط فيها العرق بالتراب حتى (انكمش) واذا لمسته تشعر بملمس الجلباب كانه معطونة فى ماء من السكر ..وطفلة يسيل مخاط انفها وامها عبثا تحاول نظافته بطرف ثوبها خوفا من الافلات ونحاول جاهدين ان نتجنب رائحة التيس والنعاج ونبذل جل جهدنا ان نحافظ على ملابسنا نظيفة من رشاش بول التيس ومهما حاولت لن تسلم …واذا اريد بك او باهلك خير ان تركب مع السواق قدام والبورى الماخمج (ططتريتا طريتا طاااريتا).
عندما يصل اللورى الى ام ضبان اول حاجة نطوف حول القبب نخش كل قبب الخلفاء السابقين والفكرة عندنا ترفية ولم نكن نفهم فكرة الزيارة واهدافها ..وهدفنا الوحيد اللعب واللهو والرغيف المدور الساخن ونفضله (قروض)بفتح القاف وحلاوة لكون وبعد داك نزور الخليفة لاحظت ابوى مجرد ما يصل الى اقامة الخليفة يستقبل بطريقة مختلفة يهمس فى اذن رجل يقف امام بيت الخليفة يوسف ..ويدخل الرجل إلى الخليفة ويسمح لنا بالدخول وعرفت لاحقا اننا من اهل الحظوة ، كان الخليفة يجلس فى عنقريب اقرب الى الارض ويرتدى توب ساكوبيس خفيف ويتحدث بصوت خافت ، ويحكى له ابوى عنى ويطلب منى الاقتراب منه ويمسك راسى ويتف عليه، الحركة كانت بتغظينى شديد وسالت ابوى عن السبب ؟ ابوى يقول دى عزيمة !!
بعد ان نخرج من الشيخ يستضيفونا فى بيت خاص وهناك نجد طعاما مختلفا (لحوم ودمعة ..كسرة. رهيفة لملاح ويكة ) وفى بعض الاحيان ناكل الكسرة الدبليبة ونشرب من موية الابريق عند رجل يجلس امام مدخل المكان الذى يجلس فيه الخليفة يوسف
نعود من ام ضبان عند الظهر محملين بالرغيف المدور وكان هذا الرغيف حاجة مختلفة وطعمه لذيذ ومخلوط(بالنخالة) والحلويات ،حلاوة لكوم والسمسمية وحلاوة فلاتة بلونها الابيض والبمبى…
=====
كان الذهاب للجرف فى الشرق والاقامة به ،هروب من النظام والترتيب الذى فرضته علينا اختنا فكانت كل حاجة بمواعيد الاكل بمواعيد والحمام بمواعيد ،والنوم بمواعيد و نظافة الوجه بالليفة والصابون واول مرة فى حياتى (اشوف زول يغسلو ليه وشو يالليفة والصابون !!).كنّا نريد التمرد على هذا النظام الذى جعل البيت كالداخلية المدرسية ،فى الشرق الحمام جنبلق فى البحر وتمرق او تقعد تحت ماسورة بابور وتمصمص جسمك وتتخارج ،لكن عند اختى النظام نظام (الحمام دعك ليفة وصابون ومسوح بالزيت ) والله فى خلاء الشرق تلقى واحد اغببببباش التقول واقع فى برميل دقيق ،كنت بقول لى امى ،بنتك دى مافى عريس بجى يخارجنا منها ؟؟!!واكتشفنا بعد كبرنا فهمها متقدم جدا .

تعليقات
Loading...