سامي مسيك يكتب: إنت محتاج تسامح عشان نفسك.

قبل كم سنة حصلت لي مشكلة مع واحد بعرفو في موضوع لمس كرامتي أو بالأحرى مسح بيها الأرض والموضوع كبر شديد والاسوأ ردة فعل الناس الحولي كانت سيئة جدا وحسيت بالخذلان منهم .
وإتطور الموضوع معاي لدرجة قاطعت كل الناس ديل ، ومرت سنين طويلة وانا جواي غضب كبير تجاهم .
بس في فترة كدا مرت في حياتي لقيت نفسي سامحتهم بدون ما احس ، وجواي كل شئ انتهى وحتى لمن لاقيتهم ما حسيت باي غضب أو أي شئ تجاهم .
الفترة دي من حياتي هي الفترة الطلعت فيها دور الضحية وشفت حياتي وبقيت شغال على المستقبل حقي , بعدها عرفت انو أنا الكنت محتاج اسامح وقلبي ما يكون فيهو أي شعور سلبي أو غضب تجاه أي شخص ، ودا لاحقا ساعدني بشكل كبير أني أعيش حياة ما فيها قلق ولا بقى عندي احساس اني عايز ارجع واغير شئ في الماضي لاني فعلا غيرتو حسي وبقت دي شخصيتي الحالية.
والاهم اني بقيت شايف تعاملي بي طيبة ما شئ غلط ابدا , بالعكس بقيت متسامح مع نفسي على اي تصرفات عملتها زمان .
لأي اي شخص عايش جواهو ذكريات مؤلمة او غضب إنت ما محتاج تسامح الناس عشان خاطر عيونهم محتاج تكبر بي نفسك من دور الضحية وتسامحها على طيبتك وتعيش حياتك بدون ما يكون قلبك مليان غضب وتشوف مستقبلك وتبنيوه.