كيف نبدأ
قبل كم يوم راسلتني صديقة صغيرة في عمرها بتسألني عن الخطوة الجاية في مشروعا وهي ممكن تعمل شنو ؟
وهي حاليا قدرت حققت 5000٪ من راس مالها كأرباح اللهو كان الف جنيه تقريبا وبقى 50 الف في غضون شهور قليلة ودا الخلاني افكر انو إذا كان عمرك فوق 18 بغض النظر عن شكل حياتك أو تحكم اهلك في شخصيتك أو متزوجة وحياتك مليانة أطفال أو أي عذر في الحياة أنت الان أمام أي قانون في الحياة مسؤول من نفسك المسؤولية الكاملة البتخليك تعمل أي شئ حرفيا وأنت مسؤول عن نتايجو إذا كانت كويسة أو سيئة أنت حر كامل الحرية في حياتك .
في ناس كتيرين بيسألوني كيف نبدأ ؟
وبيقولو انو عندهم الف سبب يمنعهم من البداية ، الغالبية العظمى من الأسباب دي شماعة بنختها لي نفسنا عشان شايفين البداية صعبه , لكن عموما مهما كانت العقبات في بدايتك صدقني هي ساهلة ، وبتقدر تتجاوزا وتحقق نجاحات صغيرة لكن الاستمرارية هي الاصعب من البداية .
الاستمرارية البتدفعك صحتك وزمنك وعلاقاتك واهلك وأي شئ عشان تواصل خلي بالك انو عشان تواصل ما عشان توصل لانو مافي شئ اسمو وصول أو عبور كما قاعدين نسمع انو فلان عابر ، لانو فلان العابر دا في نظرو في ناس عابرين اكتر منو وهو لازال في الطريق و كدا الموضوع لحد اعبر واحد .
في ناس كتيرين بيشاركوني جزء من بداياتهم ، ناس بدوا مشروع بي الف جنيه وحسي وصلو ٥٠ الف، وناس بدو يرسمو ليهم شهور بسيطة وآخر رسماتهم خلعتني تماما , وناس إتجاوزو ازمات حياتية مريرة مرت عليهم طلاق وناس إكتئاب وناس عدم إنجاز وكلهم قدرو يتجاوزو الحاجة دي .
انت كبير كفاية عشان تتجاوز البداية ومسؤول كفاية عشان تستمر .
وأخيرا البداية ما مهمة المهم انك تستمر .
#Sami_Meseik
