مصطفى صديق يكتب :ما بنعرف كيف نقعد!!.

القعدة الوااااحدة (الجلوس)
لاحظو كل الصور الرسمية و الفيديوهات الرسمية و البرامج التلفزيونية بتلقو الأغلبية ما بعرفو يقعدو قدام الكاميرا
نبدأ بالصور والفيديوهات في اللقاءت الرسمية تحسهم قاعدين في( لستك) قدام دكان في طرف الحلة.
الجلوس هيبة قبل ما تجلس صلح لبستك لو بنطلون او جلابية
انا كمشاهد مافي سبب واحد يخليني اشوف (ساقك) او (شراباتك).
انت كجهة رسمية في لقاء رسمي اقعد صاح و البس صاح لانك بتمثل جهتك انت ما قاعد في بيتك!!!
اختارو كجهات رسمية مصورين محترفين علشان يصوركم بمنظر يليق بهيبتكم و جهتكم البتمثلوها
و انت كمصور لاي جهة في حاجة اسمها (zoom) و في حاجة اسمها زواية مناسبة للقطة مناسبة.
نفس الحاجة دي موجودة في البرامج التلفزيونية دائما تحس انه الضيوف جلستهم (مشاترة).
بالذات في البرامج الفيها كم ضيف.
لو كانت مباشرة او مسجلة
ده دور الإخراج او المصور او مقدم البرنامج.
و الله مافيها حاجة لو قلت ليه (صلح قعدتك).
ده غير البدلة دائما تلقاها اكبر من الضيف او مقدم البرنامج.
انا عن نفسي ما شايف انه البدلة دي شي ضروري بالذات لو كانت (مشاترة) بقميصك العادي بتكون جلستك و منظرك احسن من انك لابس ليك بدلة اكبر منك و قاعد قعدة (مشاترة ).
نتعلم نقدم نفسنا كجهات رسمية و كضيوف على أية قناة بطريقة لائقة.
نقدم صور و جلوس فيه( هيبة )
التقديم بطريقة لطيفة و منظر جميل بخلي المشاهد يركز في كلامك مافي (قعدتك)
دور المصورين في الحاجة دي مهم جدا.