واحد من الناس… بخيتة بائعة الآيسكريم: الحياة صعبة والبمسك في درب الله ما بتوه.
الخرطوم : آلاء الشرقاوي
— مدخل
وانت ماشي في دروب الحياة بتواجهك ظروف وبتلقى ناس مختلفين ممكن يكونو سند ليك في الحياة ويدوك دافع للعمل والنجاح وممكن كمان تلقى ناس سلبيين يحاولوا يثبطو عزيمتك. الخالة بخيتة من نوع الناس البزرع فيك الأمل والنجاح إمرأة مكافحة استطاعت انها تربى أبناءها بالكسب الحلال فقطفت ثمرة تعبها واجتهادها. التقيتها في طريقي تبيع الايسكريم فجلست معها وكانت هذه الدردشة مع الخالة بخيتة حامد.
السلام عليكم..
عليكم السلام يا بتي.
-اسمك منو يا خالة؟
اسمي بخيته حامد.
من وين في السودان؟
من النهود ولدوني فيها وكبرت فيها.
-بداية جيتك للخرطوم متين؟
أنا جيت من التسعينات، وساكنة
الحاج يوسف التكامل مربع ٢.
– اشتغلتي متين؟.
أنا بديت اشتغلت سندوتشات وآيسكريم، فترة شارع النيل لما اتقفل وتاني لما فتح خليت السندويشات وبقيت شغالة آيسكريم بس (داندرما).
-شغلك مغطي معاك مصاريف البيت؟
الحمدلله رب العالمين عملت منو حاجات كتيرة، ربيت وقريت بيهو اولادي الحمدلله والمعيشة في البيت.
-بتطلعي شغلك الساعة كم وبترجعي متين؟.
بمشي من الصباح وبرجع الساعة ١٢ ومرات الآيسكريم بخلص قبل ١٢ وأول ما يخلص برجع البيت طوالي.
– اتعلمتي شنو في شغلك وتعبك من الحياة بصورة عامة؟.
اتعلمت كتير، اتعلمت كيف أفكر والزول داير شنو من الحياة، وأنا زمان بديت بحفاظة واحدة وشوية شوية الظروف اتحسنت شلت اتنين والحمدلله لحد ما وصلت خمسة.
-واجهتك ضغوط صعبة
ومواقف كويسة حصلت معاك في الشغل ممكن تحكي لينا؟.
كتيير ي بتي طبعا انا بحكم إني لي زمن في الشغل دا عملت لي زبائن مرات كتيرة بدوني اكتر من حقي ومرات ناس قروشهم بتقصر بمشي ليهم سبحان الله ربنا بعوضني ليها..
وحاجات كتيرة من رحمة ربنا بينا الحمدلله. ومرت بي ظروف صعبة شديد يا بتي والله بس الحمدلله ما استسلمت ودايما عندي إصرار وعزيمة انو أواصل في درب الكفاح والعمل الحلال عشان ربنا يبارك لي فيه.
– عندك كم من الاولاد؟.
عندي تمنية الحمدلله، ستة أولاد وبتين ماشاءالله ربنا يحفظهم لي.
الأمين.. قرأ محاسبة واتخرج وهسي في السعودية.
مهند.. اتخرج .
حمد.. قرأ هسي سايق ركشة.
إبراهيم.. شغال سواق.
أسامة.. بقرأ في الجامعة.
مأوى.. امتحنت شهادة سودانية.
معزة.. ممتحنة تامن.
مجتبى.. ممتحن شهادة سودانية.
-وين زوجك من شغلك وتعبك دا؟.
زوجي كان عسكري وإتصاب في العمليات . في يدو اليمين من فوق وخشمو كمان..الإصابة كانت كبيرة.
– رغم الحصل معاك ما استسلمتي للظروف؟.
والله يا بتي عانيت معاناة في البلد دي بس الحمدلله رب العالمين قالوا من جد وجد ومصرة وعندي إيمان كبير بربنا.
والراحة الكنت عايشاها في بيت ابوي الله يرحموا. ما لقيتا في بيتي وعانيت بس صبرت والحمدلله، ربنا عوضني بنجاح أولادي. لما جيت من البلد كنت قاعدة في بيت عشوائي ولمن زوجي مشى الجنوب ترك لي تلاتة أولاد كنت بعمل ليهم الأكل واطلع شغلي وفي الليل بجي بدق طوب لحدي ما بنيت لي غرفة واحدة، اجتهدت وجريت ورا البيت لحدي ما سجلتوا في الإسكان، والحمدلله ربنا رحمني في أولادي وربيتهم أحسن تربية خلق وأخلاق الحمدلله.
ولحدي اليوم اي حفاظة اشتغلت بيها لسة قاعدة في البيت محتفظة بيها عشان يعرفو انهم اتربوا بالحلال.
ودا يا بتي دور كل ام إنها تربي أحسن تربية لأنها الاساس وكل حاجة بتبدأ منها .
– نصيحتك شنو لأمهات اليوم؟.
بقول لأي أم مجتمعنا بقى صعب و الأطفال اتشردو ودا كلو عدم إهتمام وعدم صبر واستسلام من الأهل والأم خاصة.
– بعض الرجال بهربو من المسؤولية وبرموا كل الحمل على الأمهات؟.
لااا اعملي وما تقولي مستحيل ضحي عشان أولادك لأنهم بعدين بنفعوك انت امهم وبعدين دا إمتحان من ربنا ولازم نصبر عشان كمان الأطفال ديل ما عندهم ذنب والأم لازم توجه وتربي عشان تجني ثمرة تعبها وتلقى اولادها سند ليها.
-أكبر انجاز من شغلك شنو؟
الحمدلله عملت لي بيت ملك وجبت ٢ ديبفريزر الآيسكريم غير المصاريف والمعيشة الحمدلله. -اولادك كبرو ماشاءالله واشتغلوا انت مواصلة لسه في شغلك لشنو؟
أنا كبرت اولادي بشغلي دا عشان كدا هم طلعوا مجتهدين وصبورين وعشان اخوانهم الأصغر منهم يضوقوا تعب الحفاظة ويعرفوا ويتعلمو الاجتهاد والصبر والشغل الحلال ما بضيع سيدو
-طيب نصيحة لكل الشباب؟. بقول ليهم انتو جيل البلد معتمدة عليكم واذا فشلتوا البلد ح يفشل. لازم تشتغلوا وتسعوا في الحلال وما تستسلموا للفشل.. وخلوا الطرق الكعبة عشان بتوديكم للهلاك. ربنا يهديهم إن شاء الله،
ونصيحتي للبنات خاصة.. استرو عرضكم وصونوا اهلكم التعبوا فيكم واحلموا واسعوا عشان تصلوا. والبمسك في درب الله ما بتوه، الزول يتقي ربنا ويصلي صلاتو وياكل حلال ويحمدالله كتير على النعم واعظم النعم هي العافية..
-كلمة وداع في ختام الدردشة دي.
شكرا ليك يا بتي ربنا يديك الفي مرادك ويسهل عليك ويوفقك.
آمين يارب العالمين.. شكرا ليك ي خالة بخيتة.
