أبو المواهب أمين مكي يكتب :صديقي ادغر

قبل أكثر من عشرة سنين كان شغال معاي واحد من دولة لاتيفيا و النصيحة ما كنته بعرف لاتيفيا دي زاته بتقع وين بس كنته عارفه من جمهوريات الاتحاد السوفيتي سابقا و انها استقلت و بعد داك دخلت الإتحاد الأوروبي .. ادغر كان اسم زميلي ..الحق يقال زول ممتاز و ذكي و مجتهد في شغلو شديد و بعد داك علاقتنا تطورت و بقي صاحب و بنتزاور بعد الشغل بحكي عن بلدو و جمال الطبيعة و نسائها النصيحة الأخيرة دي حقيقة ???????? مرة قال لي انو قرر يتزوج صديقتو الكان عايش معاها و الزواج حيكون في ريغا عاصمة لاتيفيا و دعاني ..طبعا قلت حاجة زي دي ما افوتها فرصة امش اشوف البلد شكلها كيف حكى لي عن حاجات كتيرة من ضمنها عمو الكضاب و قصصو فقلت يا الخفسو فرصة تقابلو تشوف الزول دا درعتو قدر شنو

اها لمن وصلت البلد قبل العرس بي يوم جاني العريس زاتو استقبلني و نزلت مع عمو و بنتو مادرا .. غايتو مادرا انا شفتها واقفة معاه في المطار انا قايل الطيارة جات طالعة بره .. ياخي لمن كرعيني بردو البت التقول جابوها من حديقة اللكوم و الحلويات ياخي انا سلمت عليها بس اتعشرقت من الحلاوة،لكن عم ادغر ما أداني ليك فرصة زاتو اقح من العشرقة بتاعة السكر دا سألني السفرة كيف قلت ليه أربعة ساعات متواصلة متعبة قال لي نحن زماااان كنا بنمشي من هنا لي المانيا في اربعة ايام بالكرعين..  يا منقة كدي اقيف انا يادوب وصلت طوالي تدرعني كدا .. طوالي اتذكرت خالي الغالي السر ملك السواقة كان لقى الجو زابط والشباب منفعل بسوق الحلة كلها دا مافي زول بفوتو الا عم ادغر دا شكلو كدا .. خالي السر قال مرة سايق قوندرانو ماشي بورتسودان و القندران بتاعو من زمن السجك بالمتر لكن مطلعو سرعتو سرعة آخر موديل من المرسيدس قال من طلع من كبري حنتوب اي عربية فاته ما خلى ليه كريسيدا وله مرسيدس ولا لاندكروزر ما فاتو  قال لمن نازل من العقبة شاف بالمرايا عربية بتأشر ليه دايره تتخطاه فقام اشر ليها تعدي ومستغرب البفوتو دا منو  لمن نزل من العقبة قال داير يتأكد القندران تمام لقي الترله مافيشه سأل المساعد .. ياولد وين الترلة قال ليه ياعم السر الحاجة الأشرت ليك قبيل و عديته دي انت قايله حبوبتك ما دي الترلة.

يااخي قال مره هو نايم في الجنوب في بيت في الطابق التاني و فاتح الشباك صحي مخلوع بموية كابه فيه لمن فتح عينو لقى السحابة دخلت بالشباك بتكب فيه قال قام دفر السحابة طلعه بالشباك و قفل الشباك و نام تاني .. يله عم ادغر جينا جمب كبري ارتفاعه قريب للمائة متر قال لي زمان كان بنتلب من الكبري دا في الموية طوالي و بغطس بقعد تلاتة ساعات تحت الموية حتى يطلع قلت ليه تلاته ساعات ياعمك الأكسجين بتجيبو من وين قال لي الزمن داك ما كان في اوكسجين.