أسفار.. أبوالمواهب أمين مكي يكتب: دا حق جعلييين!!

عديلي الخواجه شوبااار جنس شوبير وغياظ لمن يعمل ليك قرحة ..يحيرك في راسك الكبير دا .. تاعبني تعب شديد لمن يجي من هولندا هو واولادو ويقعد معاي اسبوع .مشكلتي شوبارو وتحشرو في اي حاجة. المشكلة الكبيرة مركب مكنة سوداني اااي وحات الله سوداني جد جد ..كان قاعد في المطبخ بتعمل ليك في سلطة دكوة يجيك يقول ليك كابي الدكوة حبة كدا مالك ..يفتح الدولاب يطلع برطمانية الدكوة يزيده .. تعمل فتة فول يشيل باغة زيت السمسم يكب نصه قدامو و بعد دا يقول ليك سمسمك دا ما أصلي ..ما بتاع عصارة جمل.
الكورة ما مديني فيها فرصة قاعد بتفرج في هلال مريخ خشه لي طوالي يمين انت بتشجع في ياتو فريق قلت ليه انا سيد بلد لازم اكون بشجع الهلال نط طوالي الهلال دا لابس شنو قلت ليه اللابس ازرق زولك طوالي اتخارج من الصالة جاني بعد دقيقتين لابس ليه فنيلة حمرا قلت ليه اها يا ( الجنيد ) ما قعد دقيقه بكري المدينه جاب القون فينا الفقر دا ادردق في الواطة زي الدوده ام اربعه و اربعين كرهتو ليك الله واحد لمن حردني العشاء ..اها اليوم داك قاعد بضرب لي في فسيخ و عامل معاه شطه خضره مولعه نااار قلت الحلبي دا ما بقرب مع ريحة الفسيخ دي ..بس وين اصلو شوبارو ما بخليه طوالي جاني دا شنو .؟؟؟ داير اطفشو علشان الفسيخ حبه ..قلت ليه دا سمك فطيسه جر كرسيه ولا سألني الفطيسة دي كانت مدفونه وله مجدوعة… طوالي قطع قطعة عيشه قمسه في الشطة و قش ربع الصحن في لقمة واحده .. الوش بقي زي الفشفاش من سخانة الشطه شال كباية الغباشه القدامي الكنت ببرد بيها الشطه قرطعه ليك و قبل علي باقي الصحن قشاه خلاه يراري و يلمع زي مغترب قطر. يااخي دا عامل فيها دنقلاوي عديل كدا ..لدرجة يوم قاعدين نتفرج في قناة الشروق و البرنامج بتكلم عن القبائل السودانية و طبعا انا بترجم ليه في كل كلمة قال لي انت دنقلاوي ماسورة يا وهم! ماسورة كيف؟.قال لي دنقلاوي ما برطن دا ما نافع ..قربت الفخو بالريموت بس استغفرت وندمني علي تعليمي ليه لكلمة ماسورة يقوم يمسورني بيها .. قلت الزول ضيفي امشيها ليه المرة دي..بس ختيته ليه في حناني و قلت ليه في سري داير تعرف انا دنقلاوي ماسورة وله لا.. بوريك ليها في يومه ..وابقى عارف في حاجه اسمها دغالة الدناقلة ودي يا حلبي الا تجري يوم أقوم عليك بيها ..
مشيت مشوار و جيت راجع الييت و معاي واحد اخونا سوداني لقيت الفرده منبطح في الكنبة في الصالة و لابس ليه عراقي و سروال من حقاتي .. قال شنو الصيف ذكرو السودان التقول شافو وبعمل لي مفاجاة .. يا فقر انت كترت المحلبيه خلااااص و رفعت لي ضغطي ..كمان عراقي الوحيد دخلت فيه .. كتمته جواي و قلت الليلة شوبيرك دا بطلعو ليك من راسك المقوقس دا .. طوالي عاينت لصحبي السوداني وقلت ليه طلع كيسك و دنكل ليك سفه .. اشوف حسن شوبار دا حيتحشر وله لا .. صحبي بزبط في السفة و الخواجه صلح طاقتي البرتقالية اللابسه فوق رويسو مع العراقي التقول تيس بطانه.. و شغال بكشف ليك فيه لمن المعلم خته السفه دقاار طوالي قال لي دا شنو … ابتسمت لمن اللوزة الشمال ظهرت عرفت ان زولي جاني محل راجيه و قلت يا خفسو المعفن دا وريه دغالة الدناقلة الجد جد علشان تاني ما يقول عليك دنقلاوي ماسورة ..طوالي شرحت ليه الفلم ..دا وارد الفاشر و العلامة المسجلة للسودانين كان ما ختيت سفه و دنكلته ما بتعتبر سوداني.اصلي .. شفته ليك عويناتو اتحركن شمال و يمين و صلح كريعاتو ..عرفته نفيستو الدنيه دخلت فيه خلاص ..طوالي واصلت ليه … السفه دي تخته بس اديها خمس دقائق (عشان الثقيل ما يتفه قبل مفعولة يشتغل) بس خمس دقائق اي وجع في جسمك يطلع منك و مرتك النقناقه دي زاته ممكن نديها واحده اليوم كلو تبتسم ليك ابتسامة البطه العزبا…. الشمار كتلو طوالي قال ليه كدي اعمل لي واحده .. صحبي النوع الحاقد داك دنكل ليه سفة و وصف ليه يخته في شلوفتو التحت كيف و عاد الخواجه التقول مادين ليه الجواز السوداني مدا يدو ترجف زي المراة الماسكه ورقة الطلاق ..شال ليك السفة و كمدا في شلوفتو التحت و اتصنم لاعارف يفتح خشمو و لا قادر يريل و يشيل و يلزه فيها بلسانو الغبيان …اقول ليه كيف يامعلم شابكني ليك اضضضضه.. شنو ؟؟؟ يقول لي اضضضضضه مكنكش فيها خايفه تنزلق منو و الخشم مشدود زي عنقريب الجنازة ..لا قادر يبلع ريق و لا يطلعو والعيون خلاااص غنطست و الخشم يرجف زي قالب الجلي ..غايتو تم الخمسه دقايق كضم بقي بس باشر لي و مادي يدو ..عرفتو ليك ود ام زقده بطنو قلبت داير يصل الحمام ..خميتو ليك و جدعتو ليك في الحمام زي شوال البرسيم ..بس وقع ليك في حوض الحمام بوشو ..اي حاجه في بطنو ليها تلاته ايام طلعها باقي الفسيخ حق أول أمس والخضرة الاتغدى بيها أمس و كمونية غداء الليلة كلو كباه غايتو الحاجه الوحيده الما شفتها و شكلها اتهضمت بدري عصيدة فطور الصباح.. وقام رقد ليك في نص الحمام غمران لا بجر ايد ولا كراع ..جريتو ليك ختيتو قدام الحمام نام ليه ساعة صحى بنضم خشمو معوج زي الزول الجاتو جلطة لمن خوفني.. بعد ما فتح كويس شال الطاقية البرتقالية من الأرض وختاها في راسو عاين لي مخلوع و قال لي دا حق جعليين ما حق دناقلة تااااااني دناقلة يا ثقيل انت ما بتتوب.